L-Università ta’ Malta hija l-ogħla istituzzjoni ta’ tagħlim f’Malta, u tikkonsisti minn 33 fakultà, ċentru u istitut. Hija istituzzjoni ffinanzjata pubblikament, l-uniku università fil-pajjiż, u hija miftuħa għal dawk kollha li għandhom il-kwalifiki meħtieġa. Reċentement hija rrevediet l-istrutturi tagħha biex tkun konformi mal-Bologna Process u l-European Higher Education Area. Għandha ‘l fuq minn 10,000 student li jinkludu ‘l fuq minn 600 studenti barrani/ta’ skambju minn kważi 60 pajjiż differenti, b’iktar minn 3000 student jiggradwaw kull sena.
Iċ-Ċentru għar-Reżiljenza u s-Saħħa Soċjo-Emozzjonali fl-Università ta’ Malta għandu l-għan li jiżviluppa u jrawwem is-saħħa soċjali u emozzjonali fit-tfal u ż-żgħażagħ. Huwa jopera bħala ċentru ta’ riċerka transdixxiplinarja f’oqsma varji ta’ riċerka u ta’ esperjenza pprovduta mid-dixxiplini differenti fil-qasam, imexxi xogħol ta’ riċerka u żvilupp fil-qasam, u jfittex li jindirizza ħtiġijiet lokali u nazzjonali filwaqt li jikkontribwixxi għall-għarfien fil-qasam internazzjonali. Iċ-Ċentru bħalissa qed imexxi żewġ proġetti internazzjonali ta’ riċerka ffinanzjati mill-UE, wieħed proġett ta’ riċerka mifrux fuq tliet snin fuq is-saħħa mentali fl-iskejjel flimkien ma’ żewġ universitajiet fir-Renju Unit u żewġ universitajiet Awstraljani, u l-ieħor fuq l-iżvilupp ta’ kurrikulu dwar ir-reżiljenza għal skejjel Ewropej li jinvolvi sitt universitajiet Ewropej. Huwa wkoll sieħeb fi proġett ieħor Ewropew dwar ir-reżiljenza tal-għalliema u l-istudju internazzjonali fuq is-saħħa soċjali u emozzjonali tat-tfal.
Iċ-Ċentru jippubblika l-International Journal of Emotional Education, journal internazzjonali, onlajn, u b’aċċess miftuħ. Minbarra li jmexxi u jippubblika riċerka lokali, Ewropea u internazzjonali dwar is-saħħa soċjali u emozzjonali u r-reżiljenza fit-tfal u ż-żgħażagħ, iċ-Ċentru jfittex ukoll li jiżviluppa strateġiji ta’ intervent u prevenzjoni mibnija fuq il-metodu empiriku u fuq teorija tajba, ixerred l-għarfien u jrawwem t-tagħlim dwar l-aqwa prattiċi u riċerka relevanti fis-saħħa soċjo-emozzjonali u r-reżiljenza, jipprovdi konsulenza lill-awtoritajiet edukattivi nazzjonali u lill-iskejjel dwar is-saħħa soċjo-emozzjonali u r-reżiljenza u l-prevenzjoni ta’ diffikultajiet soċjali, emozzjonali u ta’ imġiba, u jipprovdi edukazzjoni u taħriġ avvanzat lill-edukaturi u professjonisti oħrajn fuq livell lokali u madwar l-Ewropa.