RESCUR huwa proġett LLP Comenius mifrux fuq tliet snin (2012-2015) ikkoordinat mill-Università ta’ Malta u jinkludi l-Università ta’ Kreta (il-Greċja), l-Università ta’ Lisbona (il-Portugall), l-Università ta’ Orebro (l-Iżvezja), l-Università ta’ Pavia (l-Italja), u l-Università ta’ Zagreb (il-Kroazja).
Hu għandu l-għan li jiżviluppa kurrikulu ta’ reżiljenza għall-edukazzjoni bikrija u primarja fl-Ewropa permezz ta’ kollaborazzjoni interkulturali u transnazzjonali billi jagħmel użu mir-riżorsi u l-esperjenza tal-imsieħba varji.
Il-kurrikulu se jkun żviluppat fuq il-bażi tal-ħtiġijiet u l-isfidi soċjali, ekonomiċi u teknoloġiċi kurrenti tal-imsieħba involuti, u jfittex li jiżviluppa fl-istudenti l-għarfien u l-ħiliet meħtieġa biex jegħlbu dawn l-isfidi f’ħajjithom biex jiksbu suċċess akkademiku u saħħa soċjali u emozzjonali bħala ċittadini żgħar fl-UE.
Huwa jfittex li jindirizza l-ħtiġijiet ta’ tfal vulnerabbli bħal tfal Roma, tfal b’diżabilità, tfal gifted, u tfal ta’ refuġjati, immigranti u minoritajiet etniċi. Il-kurrikulu se jinkludi wkoll gwida ta’ attivitajiet ta’ reżiljenza għall-ġenituri biex isaħħu dawn il-ħiliet li jiġu mgħallma fl-iskola. Il-kurrikulu se jkun ippilotat f’numru ta’ skejjel f’kull pajjiż imsieħeb u l-prodott finali jinkludi manwali għall-għalliema fl-iskejjel u għall-ġenituri.
Jekk inti tixtieq tirċievi notifiki jew aħbarijiet dwar il-proġett, jekk jogħġbok ibgħatilna email u tiġi miżjud/a mal-lista postali tagħna.